നൈറ്റ് ഡ്യൂട്ടി (NIGHT DUTY)

ഐവി ഫ്ലൂയിഡിന്റെ ഇറ്റു വീഴുന്ന പ്രതീക്ഷകൾ, വിരസതകൾ

നോക്കി കിടക്കും 

ആവര്‍ത്തിച്ചാവര്‍ത്തിച്ച് വായിച്ച 

അതേ വാര്‍ത്തകൾ 

മടക്കി, നീട്ടി നിവർത്തി 

ഉറങ്ങും
ഇടയ്ക്കെണീറ്റ്
ലാത്തികൊണ്ട്
ഒരു കുത്തിയോർമപ്പെടുത്തൽ

പ്ലാസ്റ്റിക്കിൽ കെട്ടിവച്ച
കറി കറന്ന്
പാത്രത്തിലൊഴിച്ച്
തണുത്ത ചോറിൽ കുഴച്ച്
ഒരാഹാരച്ചടങ്ങ്‌

ചില നമ്പരുകളിലെ നിലവിളി
പിന്നെ പുതിയ ബെഡ് ഷീറ്റ്
ചവറ്റു കൊട്ടയിലെ
ഉരച്ചു ജീവൻ നിറച്ച റീചാർജ് കാർഡുകൾ
നാരങ്ങാതൊലികൾ
ബീജങ്ങൾ
ചൂടു വെള്ളത്തിന്‌ നിറം പകർന്ന
രുചി പകർന്ന നൂലിൽ കെട്ടിയ പായ്കറ്റുകൾ

ആശുപത്രികളിൽ സ്ഥായീഭാവം നിശ്ചലതയാണ്

രാത്രി പുലരുന്നു
പുതിയ തീരുമാനങ്ങൾ
വേദനകൾ
പുതിയ അതിഥികൾ
കാത്തിരിപ്പുകൾ
കാത്ത് കിടപ്പുകൾ.

                     ---സന്തോഷ്‌ കുമാർ കാനാ